Ezinbestekoa zaigun trantsizio energetikoa eta ekosoziala bidelagun arriskutsuak erakartzeko gune bihurtzen ari da. Duela gutxi jakin dugunez, Espainiako 200 aberastasun handienetatik 15ek sektore berriztagarrietan biltzen dute beren ondare gehiena. Amancio Ortegak, Inditexen jabeak, energia berriztagarrien zati bat erosi berri dio REPSOLi, 363 milioi euroko balioarekin. Energia berriztagarriak, Europako Itun Berdearen itzalpeko gobernuen adostasunarekin, aukeraren eta espekulazioaren arteko azoka hau elikatzen ari dira.

Azken urteotan hainbat krisi izan ditugu. Lehenik, 2008ko mundu mailako eta efektu suntsitzaileak izan zituen krisi ekonomikoa izan zen, zeinetaz 15 urte geroago oraindik ez garen suspertu. Ondoren, mundu mailako pandemia larri baten ondoriozko krisia etorri zen, eta, azkenik, prezio eta inflazio krisi berri batean murgilduta gaude, ustez, Europan eman den gerra baten ondorioz sortu izan dena. Hala ere, inori ez dio ihes egiten “koiunturazko” krisi hauen guztien azpian badagoela zerbait merkatuak funtzionatzeko darabilen eskaera eta eskaintza legeetan sor daitezken arazo soiletatik haraindi doana.

Duela hiru aste Sustrai Fundazioak Bortzirietan eta Malerrekan poligono eoliko berriak jartzeko enpresa baten mugimenduak ezagutarazi zituen. Bultzada irrazional desarrollista horri eusteko borondateak ez du amaierarik, antza. Horrela, Goizueta, Arano eta Hernani arteko triangeluan tamaina handiko poligono eoliko bat jartzeko asmoa ezagutu ahal izan dugu, Nafarroako zein Gipuzkoako eremuei eraginez. Bai proiektuaren dimentsioengatik, bai autonomia-erkidego desberdinei eragiten dielako, Madrildik egiten ari dira tramitazioak.

Makropoligono eolikoen eta fotovoltaikoen hedapenak eta goi-tentsioko proiektu berriek aurrera jarraitzen dute Nafarroan. Eta hori enpresa elektriko handien eskutik gertatzen ari da, beren interes espekulatiboen erritmora, eta Nafarroako Gobernuaren laguntzarekin. Horrela, Bortzirietan eta Malerrekan biodibertsitatea suntsitzen duten makropoligono eolikoak jartzeko enpresa berrien asmoa ezagutu ahal izan dugu.