Joan den 2019ko urrian, Sustrai Erakuntza Fundazioak 10 urte bete ditu. Ez dugu ezer ospatzeko. Zoritxarrez, Sustrai Fundazioaren lana indartzen jarraitzeko beharra dugu, ekarpen ekonomiko gehiagorekin eta militanteen lan gehiagorekin.
Ingurumen-gatazka gehiago ditugu, gero eta luzeagoak direnak sistema kapitalistaren erregimenarekin. Sistema kapitalista natur-baliabideen espoliatzailea da, lurraldearen bortxatzailea, pertsonen eta herrien bizitza eta ametsen harraparia, eta hala ere, aurrera jarraitzen du, aldaketa-, aurrerapen- edo ordezte-gobernuekin indartuta.
Kapitalaren botereak osasun ona du planetaren kontura eta Nafarroan demokratikoki aukeratutako laguntzaileekin. Gauza dira ostiraletan larrialdi klimatikoa salatzen duten ekintzaile gazteekin argazkiak egitea eta, astelehenetan munduko krisi klimatikoa areagotzen eta sakontzen duten azpiegiturak onartzea eta bultzatzea.
Urte gogorrak datoz, batez ere langile klasearentzat herrialde guztietan eta botere ekonomikoak dagoeneko martxan jarri du faxismo berria kapitalismo berde eta teknologiko batekin azenario mediatiko gisa.
Nafarroa, aniztasun eta gatazka handiko lurraldea! Azken lau urteetan, aurreko hamar urteetan baino gehiago aurreratu da AHTaren eraikuntzan; Castejongo zentral termiko ilegalak 20 urtez salatu ondoren, foru gobernuetan inork ez du ezer egin nahiz eta hamaika epaik agerian jarri zentral horiek ez dutela legea betetzen. Betiko proiektuen alde apostu egiten jarraitzen dute: meatzaritza-proiektuak, autopista elektrikoak, Esaren urtegia, Nafarroako Ubidea, akuiferoen ustiapena Egaibarrean, hondakinen makroplanta Imarkoainen, tiro-poligonoa Bardean, espekulatzaileek diseinatutako parke eolikoak, golf-zelaiak, eta aspertzeraino luzatzen den zerrenda.
Eustea geratzen zaigu. Mugimendu ekologistaren, sindikalaren eta feministaren arteko aliantzak sortu eta klase-ikuspegi batetik antolatu kapitalismoarekin amaitzeko, hark gurekin amaitu aurretik. Horretan gabiltza.
Pablo Lorente Zapatería,
Sustrai Erakuntzako kidea
(Haizeak CGT Nafarroako aldizkarien lehen argitaratutako testua).
