Sakanako AHTren proiektuaren planoak eta afekzioak azken zati komunean (Iturmenditik Olaztira)

Duela gutxi jendaurrean jarritako Itza eta Sakanako AHTren proiektuaren dokumentaziotik ateratako planoak aztertzen dituen serieko azken artikulua da hau. Hemen ibilbidearen azken zatia erakusten dugu, Altsasu ingurukoa, alternatiba bakarra duena. Aurreko sarreretan gainerako ibilbidea aztertu dugu (behean, artikulu guztietako indizea).

Ipar eta Hego alternatiben zati independenteen ondoren, Iturmenditik aurrera, bi alternatibek 7 kilometro inguruko tartea partekatzen dute. Azken zati komun honek Iturmendi, Urdiain, Altsasu eta Olaztin izango du eragina.

220.425 m2-ko afekzioa eta desjabetzea ekarriko du, honela banatuta: Altsasu (80.417 m2), Urdiain (62.068 m2) eta Olazti (62.068 m²). Hala ere, alderdi honetan informazio kontraesankorrak daude, ikusiko dugunez.

Lehen 3 kilometroetan, Iturmendi, Urdiain eta Altsasuko zati batean, 2+1 plataforma mantenduko litzateke egungo linearen ondoan. Jarraian, zabalera estandarreko AHTaren bi bideak batu egingo dira, bi burdinbideko plataforma bat osatuz: bat, zabalera estandarrekoa, eta bestea, zabalera iberikokoa, oraingo lineari dagokiona.

AHTa Iturmenditik, alternatiba bakarra dago zonalde honetan.

Beste 1,4 kilometroren ondoren, Altsasun dagoeneko, zabalera-aldagailua izeneko instalazio bat aurreikusten da. Bertan, zabalera estandarreko trenek haien ardatzak zabalera iberikora aldatuko dituzte, honela, aldagailu honetatik ateratzerakoan, zabalera iberikoko trenbide berri batera pasako lirateke. Zabalera iberikoko trenbide berri hau Olaztiraino iritsiko litzateke eta bertan, gaur egun dagoen bide bikoitzarekin bat egingo luke. Altsasuko geralekuaren aurretik eta ondoren, kontrako bi ihesbide jarriko dira, mugimendu guztiak egin ahal izateko.

AHTa **Altsasuko** lehen zatian, Ondarria industrialde paretik.

AHTa **Altsasuko** bigarren zatian, desbideraketan, alde batetik Gipuzkoa aldera, eta bestea Arabara, **Olaztitik**.

Ondoren, saihesbide bat jarriko da, Altsasuko geltokirantz doan adarrarekin lotuko dena. Beste adarretik (Gasteizerako norabidean), zabalera iberikoko trenbidearen bikoizketa berria mantenduko da, Madril-Irun trenbidearekin lotzen den konexiora iritsi arte, eta beste ihesbide eta bazterbide bat sortuko da.

AHTa **Olaztin**, ibilbide bukaeran eta oraingo trenekin bat egiten den lekuan.

AHTren zati hau, printzipioz, aldi baterakoa dela suposatzen da, AHT eta tren konbentzionala aldi batez lotzeko, AHTak Gasteizerantz edo Ezkio-Itsasorantz jarraituko duen erabakitzen duten bitartean…

Azpimarratzekoa da AHTak azken lau herri hauetan eragindako azalerak aztertu ditugula, eta ikusi dugula eragindako metro karratuak ez datozela bat iparraldeko alternatibaren eta hegoaldekoaren arteko zerrendan, nahiz eta azken lau herri hauek azken zati komunekoak izan. Gainera, planoak ikusita, zeinak herri hauetan bi aukeretarako berdinak baitira, ez dugu justifikaziorik ikusten eragindako azalerak desberdinak izan daitezen bi aukeretan. Ez dugu uste Ministerioak aurkeztu duen informazio-azterlana behar bezala egin duenik.